miércoles, 15 de julio de 2015

T'a escuela




Igual como siempre trobo Aragón.
Ista tierra no ye que una femera
con tobos bafos que dan gomitera;
no ye casa nuestra, ye un foricón.

Semos maracos por telebisión,
moñacos á tientos en a fosquera.
Nomás zangarría libre a zierzera
por güebras e mons escando perdón.

A chen d'Aragón amaga en a pocha
o suyo corazón, e en o corazón
a más apatusca encuria e dexadez.

No puede dexar-se a luenga en un cantón
sin ni sisquiá debantar os alazez.
¡Cal lebar-la t'a escuela e fer pinocha!



«Iste poema ye estau publicato en a rebista Fuellas d'o Consello d'a Fabla Aragonesa».
http://www.consello.org/pdf_fuellas/fuellas%20219-220.pdf

«T'a escuela; a la escuela;
trobo, hallo;
femera, estercolero;
tobos bafos, fofos vahos;
gomitera, ganas de vomitar;
foricón, covacho;
maracos, caricaturas;
moñacos, criajos;
á tientos en a fosquera, a tientas en a oscuridad;
zangarría, deambula;
en a pocha, en el bolsillo;
en un cantón, en una esquina;
os alazez, sus cimientos;
e fer pinocha, y hacer piña».



«En l'afoto amanexe a escuela de Ansó. A primera en que estudié as letras e os lumers. Remero que un diya o mayestro me fazió posar en a primera ringla chunto t'a estufa porque yera d'os más chiquins. Dimpués me'n fue t'a escuela de Urdués, en a bal d'a lau, en do i plegué a estar d'os mayors. No gosé estudiar ansotano ni cheso porque yera bedau. Agora s'amuestran d'una traza ofiziosa, li claman "boluntaria", anque quieren dizir pribada, particular. A luenga aragonesa encá no ye reconoxita en o Estatuto como luenga propia. ¿Será de bel atro, pues?, ¿será nabarro-aragonés u riojano como diz bel filologo ultranazional? Antiparti, as Comunidaz que han luenga propia so no ne han que una, no dos ni tres, cadaguna a suya, anque aigan más. Istoricamén en Aragón se ha charrau o romanze aragonés. Cualsiquier filologo que no s'imbente a reyalidá lo sabe. Os nuestros representans politicos no la charran ni la quieren charrar a tamás de que en España ye tan ofizial a luenga propia d'o Estau como as luengas propias d'as Comunidaz. En ixo s'alazeta a reconziliazión nazional. Ye custión de umanisno e de cultura, de respetar a l'ombre a trabiés de todas as luengas que fabla. Todas son respetables. Aragón, sin dembargo, no cumple ixe prenzipal mandato costituzional. Si os mainates no charran aragonés ¿nos representan a nusatros u representan a otris que no sigan aragoneses? "L'aragonés t'a escuela" quiere dizir que os politicos han que dar exemplo estando os primers en charrar-la con respeto, d'una traza correuta, sin de trepuzons, poqué a poqué e á bonico. Pa ixo s'amenista a escuela».

lunes, 6 de julio de 2015

caballez blancos



Yera a polideza berda
d'as bals encomelladas
suabe tristura fresca
zaga as pasadas tronadas.

Yera a remor d'a mañana,
con as tascas tan mulladas,
sentimientos d'augua clara
que los se'n leba e enxagua.

Os caballez alaus blincan
como blanca amadrugada,
baxaus d'o zielo entre chislas
a esclarexer a gollada
 d'a frongosa selba.



«Caballez, caballitos;
polideza, belleza;
berda, verde;
encomelladas, ondulantes;
tristura, tristeza;
remor, rumor;
tascas, prados;
mulladas, mojadas;
enxagua, enjuaga;
amadrugada, amanecer;
chislas, gotas;
esclarexer, aclarar;
gollada, mirada;
frongosa, vanidosa;
selba, bosque».